Baldur Borgþórsson, varaborgarfulltrúi Miðflokksins, segir engan borgarfulltrúa í meirihlutanum hafa verið ánægðan með að hann skyldi birta launaseðilinn sinn opinberlega. Hann sagði í Bítinu á Bylgjunni í morgun að hann ætli að leggja fram tillögu á næstunni um að heildarlaun borgarfulltrúa og varaborgarfulltrúa liggi ávallt fyrir.
Sjá einnig: Baldur varaborgarfulltrúi birtir launaseðil sinn og krefst meira gagnsæis
Hann segist hafa átt von á að allar upplýsingar um kaup og kjör borgarfulltrúa lægju fyrir á vef Reykjavíkurborgar. „Ég var frekar hissa á því vegna flokka sem eru þarna inni sem tala mikið um gegnsæi.“ Baldur segir að þegar hann hafi borið upp tillöguna þá hafi hann ekki fengið jákvæð viðbrögð frá fulltrúum meirihlutans. „Það var mín upplifun, ég bar þessa hugmynd upp og mér brá hvað viðbrögðin voru lítið jákvæð.“ Baldur segir að þegar hann hafi birt sinn eigin launaseðil þá hafi hann fengið dræm viðbrögð hjá meirihlutaflokkunum. „Við getum orðað þetta sem svo að ég var ekki vinsælasta stelpan í partýinu.“
Fram kom í launaseðlinum sem Baldur birti að hann er með rúmar 786 þúsund krónur á mánuði hjá borginni og fær því alls 530 þúsund krónur útborgaðar. Föst nefndarlaun eru 726 þúsund krónur og starfskostnaður er um 52 þúsund á mánuði.
Laun borgarstjóra, borgarfulltrúa og varaborgarfulltrúa eru opinberar upplýsingar sem eru aðgengilegar fjölmiðlum og almenningi.
Sjá nánar: Laun borgarfulltrúa hækkað um rúm 22 prósent
Sjá nánar: Borgarritari og sviðsstjórar Reykjavíkurborgar launahæstir með 1.5 milljónir á mánuði
Á vef Starfsmannafélags Reykjavíkurborgar má einnig nálgast launatöflur þeirra sem starfa hjá borginni, eftir atvinnugrein og starfsstétt. Þar er reiknað eftir meðaltali.
Á vef Alþingis má nú finna sundurliðaðar upplýsingar um kjör þingmanna og ráðherra. Baldur segir að þessar upplýsingar séu vissulega opinberar en það þurfi að gera þær aðgengilegri. „Ef þú ert klár í því að sörfa á netinu þá eigir þú að getað komist að því hvað er greitt fyrir nefndarsetu og svo framvegis, þannig eigi þetta að vera aðgengilegt. Það er ekki svoleiðis, ég gæti ekki reiknað út mín eigin laun með þeirri aðferð,“ segir Baldur.