Í gær birti Alþingi sundurliðun á kostnaði við hátíðarfundinn á Þingvöllum þann 18. júlí líkt og Eyjan greindi frá. Í dag er sundurliðunin birt að nýju, þar sem einn kostnaðarliðurinn var rangur í frétt Alþingis í gær.
Í gær kom fram á vef Alþingis að kostnaður við palla og gangvegi (efni og vinna) hefði kostað rúma 31 milljón. Í dag er birtir Alþingi uppfærðan lista, þar sem kostnaður við palla og gangvegi er kominn í rúmar 39 milljónir.
Heildarkostnaður breyttist ekki við leiðréttinguna.
Kostnaður við Þingvallafundinn fór 41 milljón fram úr áætlun og hafa margir lýst yfir óánægju sinni með það á samfélagsmiðlum. Líkt og Eyjan greindi frá gagnrýnir Snæbjörn Brynjarsson, varaþingmaður Pírata, forseta Alþingis harðlega í pistli á Stundinni, fyrir aðkomu sína að málinu og krefur hann um afsögn.
Mörgum hefur orðið tíðrætt um kostnað við lýsingu fundarins, sem fram fór um hábjartan dag. Sú lýsing var þó gerð sérstaklega fyrir sjónvarp, sem krefst mikils ljósmagns umfram dagsbirtu, en Snæbjörn setur kostnaðinn við lýsinguna í samhengi við öllu alvarlegra málefni:
„Til samanburðar má nefna að nú á að setja 25 milljónir í baráttu gegn sjálfsvígum ungmenna á Íslandi, vandamál sem er talsvert brýnna en lýsingin í DVD upptöku fullveldishátíðarinnar. Hátíðin endaði á að kosta 87 milljónir. Um allt þetta fíaskó mætti kannski segja, ljósin voru kveikt en það var enginn heima.“
Sjá má rétta sundurliðun hér að neðan:
Pallar og gangvegir (efni og vinna) 39.146.073 kr.
Hljóðkerfi – 3.790.720 kr.
Lýsing – 22.026.370 kr.
Veitingar – 2.222.564 kr.
Ferðakostnaður – 1.413.000 kr.
Tónlist – 2.070.000 kr.
Raflögn – 4.588.548 kr.
Hönnun og ráðgjöf – 9.169.706 kr.
Gæsla – 2.558.434 kr.
Samtals = 86.985.415 kr.
