Heildarkostnaður Alþingis vegna Þingvallarfundarins þann 18. júní síðastliðinn hefur verið birtur sundurliðaður á vefsíðu Alþingis. Stærstu kostnaðarliðirnir eru við palla og gangvegi, rúm 31 milljón.
Því næst er lýsing, sem kostaði 22 milljónir. Þá kostaði hönnun og ráðgjöf rúmlega 9 milljónir.
Á vef Alþingis segir að kostnaður hafi farið nokkuð fram úr áætlun, en upphaflega var áætlað að kostnaðurinn yrði 45 milljónir, samkvæmt svari Steingríms J. Sigfússonar, forseta Alþingis, við fyrirspurn Björns Leví Gunnarssonar, þingmanns Pírata, í júní. Þó var gerður sá fyrirvari að kostnaðurinn gæti hækkað eftir umfangi.
Það umfang var til dæmis sagt vera aðkoma RÚV að fundinum vegna beinnar útsendingar.
Kostnaður RÚV vegna beinnar útsendingar fundarins var þó aðeins 5,5 milljónir, samkvæmt svari Skarphéðins Guðmundssonar, dagskrárstjóra RÚV, við fyrirspurn Eyjunnar. Einnig kemur fram í svarinu að RÚV hafi enga sérstaka greiðslu hlotið frá Alþingi vegna útsendingarinnar.
Ástæða þess að kostnaðurinn fór fram úr áætlunum er sögð vera eftirfarandi á vef Alþingis:
„Er það einkum vegna þess að tekin var ákvörðun um að hafa lýsingu og hljóð af bestu gæðum þar sem atburðurinn var í beinni útsendingu. Einnig var haft í huga að upptaka af fundinum myndi varðveitast til framtíðar sem heimild um sögu þjóðarinnar. Vinna við að bæta og laga göngustíga á Þingvöllum fyrir viðburðinn mun áfram nýtast gestum þjóðgarðsins.“
Heiðursgestur fundarins var forseti danska þingsins, Pia Kjærsgaard, en aðkoma hennar að fundinum var harðlega gagnrýnd af Pírötum og Samfylkingunni.
Má gera ráð fyrir að kostnaðurinn við ferðakostnað og uppihald Kjærsgaard sé inni í tölunum um ferðakostnað og gæslu, sem er samanlögð um fjórar milljónir króna.
Sjá má sundurliðunina hér að neðan:
Pallar og gangvegir (efni og vinna) 39.146.073 kr.
Hljóðkerfi – 3.790.720 kr.
Lýsing – 22.026.370 kr.
Veitingar – 2.222.564 kr.
Ferðakostnaður – 1.413.000 kr.
Tónlist – 2.070.000 kr.
Raflögn – 4.588.548 kr.
Hönnun og ráðgjöf – 9.169.706 kr.
Gæsla – 2.558.434 kr.
Samtals = 86.985.415 kr.