Baldur Borgþórsson, varaborgarfulltrú Miðflokksins í Reykjavík, birti í síðasta mánuði launaseðil sinn og vildi með því ganga fram með góðu fordæmi. Vildi hann að aðrir borgarfulltrúar gerðu slíkt hið sama og kallaði eftir gegnsæi.
Þá lagði Baldur fram tillögu þess efnis að heildarlaun borgarfulltrúa og varaborgarfulltrúa yrðu gerð opinber á þar til gerðri upplýsingasíðu, líkt og Alþingi hefur gert yfir laun þingmanna.
„Það er leiðar en orðum taki að það góða fordæmi sem Alþingi setti þar skuli hafa verið hafnað af flokkum í borgarstjórn sem stæra sig af að hafa gagnsæi í öndvegi.
Í staðinn skal birta texta um réttindi borgar- og varaborgarfulltrúa, en samkvæmt honum eru hæstu heildarlaun kr.1,090,192,- og engar uppl um ferðakostnað, dagpeninga né nokkurn hlut annan. Þarf vart að fara orðum um að þessar tölur standast enga skoðun,“
segir Baldur. Sjálfstæðisflokkur og Flokkur fólksins studdi frumvarp Baldurs, en:
„Sósíalistar sáu sér af einhverjum ástæðum ekki fært að berjast með okkur og sátu hjá við atkvæðagreiðslu,“
segir Baldur og bætir við:
„Þar með fóru gagnsæi og góðir stjórnsýsluhættir í jólaköttinn, væntanlega þennan á Lækjartorgi. Ég legg því til að á Þorláksmessu taki borgarfulltrúar Vg-C-P-Sf sig til, mæti á Lækjartorg og fóðri þar jólaköttinn hver með sínu afriti af frumvarpinu. Sósíalistar geta svo staðið hjá.“
Baldur sagði í Bítinu á Bylgjunni fyrir skemmstu að enginn borgarfulltrúi í meirihlutanum hefði verið ánægður með að hann skyldi birta launaseðilinn sinn opinberlega. Hann sagðist hafa átt von á að allar upplýsingar um kaup og kjör borgarfulltrúa lægju fyrir á vef Reykjavíkurborgar. En þegar hann hafi borið upp tillöguna og birti launaseðil sinn, fékk hann dræm viðbrögð:
„Við getum orðað þetta sem svo að ég var ekki vinsælasta stelpan í partýinu.“
