Brynjar Níelsson, þingmaður Sjálfstæðisflokksins, virðist undrandi yfir ummælum Snæbjörns Brynjarssonar, þingmanns Pírata, á Alþingi í gær, er honum blöskraði framferði Miðflokksþingmannanna fjögurra sem hafa ákveðið að leita réttar síns gagnvart Báru Halldórsdóttur, öryrkja og fötlunaraktivista, sem tók upp samtal sexmenninganna á Klaustur bar.
Snæbjörn sagði meðal annars að fjórmenningar Miðflokksins hefðu hvorki manndóm né kjark til þess að biðjast afsökunar á hegðun sinni eða segja af sér og biðjast fyrirgefningar.
Brynjar segir um Pírata í kaldhæðni, að um þá gildi önnur siðferðisviðmið en aðra. Er það tilvísun í ummæli Snæbjörns síðan í sumar, þegar hann fjallaði um andlát repúblikans og öldungadeildarþingmannsins John McCain á heldur nöturlega hátt, en Snæbjörn tilnefndi æxlið sem dró McCain til dauða, til friðarverðlauna Nóbels í grein á Stundinni.
Óskaði Snæbjörn þess í niðurlagi greinar sinnar, að McCain myndi brenna í helvíti, en grein hans vakti mikla athygli og var fordæmd víða, ekki síst af hægri mönnum.
Brynjar telur Pírata vera óþjótandi uppsprettu þekkingar, en færslu sína skrifar hann við frétt Eyjunnar af ummælum Snæbjörns í garð McCain:
„Hinn skeleggi varaþingmaður Pírata, Snæbjörn Brynjarsson, krafðist í þingræðu afsagnar Klaustursbræðra vegna orðbragðs þeirra um aðra, ekki síst um stjórnmálamenn. Fékk hann sérstakt klapp á bakið og hrós frá formanni velferðarnefndar fyrir ræðuna. Óvarlegt tal með dassi af lítilsvirðingu er þekkt í einkasamtölum og ekki til eftirbreytni en ég vissi ekki að það væri öllu alvarlegra en slíkt tal opinberlega og ætlað öllum. Alltaf lærir maður eitthvað nýtt af Pírötum en ég vissi svo sem áður að önnur siðferðisviðmið gilda um þá en aðra. Rétt er að nefna að Snæbjörn er ekki einn af sonum mínum svo að varfærni hans í orðræðu um menn og málefni er ekki frá mér komin.“