Í greinum sem Gunnar Smári Egilsson skrifaði í vefritið Miðjuna um helgina og á Facebooksíðu sína um launuð störf eiginkonu sinnar, Öldu Lóu Leifsdóttur, fyrir stéttarfélagið Eflingu nafngreinir hann Kristjönu Valgeirsdóttur fjármálastjóra Eflingar. Gunnar segir Kristjönu hafa gert greiðslur til Öldu Lóu að fréttaefni vegna deilna hennar við yfirmenn á skrifstofu Eflingar og einnig sakaði hann Kristjönu um spillingu í starfi sínu hjá Eflingu eins og Eyjan skýrði frá um helgina.

Morgunblaðið fjallar um málið í dag og hefur eftir Kristjönu að hún mótmæli þeim ásökunum sem á hana eru bornar.

„Það er mjög athyglisvert að starfsmaður stéttarfélags til 36 ára, sem unnið hefur undir stjórn þeirra Guðmundar J., Halldórs Björnssonar og Sigurðar Bessasonar, þurfi að ráða sér lögmann til að verja sig þegar stéttarfélagið hefur það hlutverk samkvæmt lögum að verja launamenn.“

Hefur Morgunblaðið eftir Kristjönu sem vildi ekki svara ásökunum Gunnars Smára og sagði að það væri í höndum lögmanns hennar. Hún vildi heldur ekki tjá sig neitt um andrúmsloftið á skrifstofu Eflingar í kjölfar þess að ný forysta tók við stjórnartaumum í félaginu.

Eins og fram hefur komið í fjölmiðlum eru fjármálastjórinn, Kristjan, og bókarinn í veikindaleyfi og hefur Sólveig Anna Jónsdóttir, formaður Eflingar, ekki viljað svara af hverju svo sé. Sólveig og Viðar Þorsteinsson, framkvæmdastjóri Eflingar, birtu yfirlýsingu á heimasíðu félagsins á laugardaginn vegna fréttar Morgunblaðsins um málið. Þar segja þau að blaðið hafi slegið fram staðlausum fullyrðingum um framkomu stjórnenda við starfsfólk félagsins. Einnig kemur fram í yfirlýsingunni að greiðslur til Öldu Lóu hafi verið í samræmi við ákvörðun stjórnar Eflingar.