Bjarni Benediktsson, fjármálaráðherra, er ósammála kjararáði um eðli tilurðar þess. Bjarni metur það sem svo að kjararáð sé sjálfstæð stjórnsýslunefnd með úrskurðarvald og teljist því til stjórnvalds. Þetta kemur fram í svörum Bjarna við fyrirspurn Björns Leví Gunnarssonar, þingmanns Pírata.
Svör Bjarna eru í takt við niðurstöðu úrskurðarnefndar um upplýsingamál, (ÚNU) sem felldi úr gildi synjun kjararáðs á beiðni Fréttablaðsins um aðgang að fundargerðum ráðsins. Taldi ÚNU að rök ráðsins, um að það teldist ekki vera stjórnvald og því giltu upplýsingalög ekki um störf kjararáðs, væri ekki gild og því bæri kjararáði að taka nýja ákvörðun í málinu.
Í svari Bjarna kemur fram að kjararáð sé sjálfstæð stjórnsýslunefnd með úrskurðarvald og hafi verið frá stofnun þess, árið 2006, en það njóti sjálfstæðis gagnvart framkvæmdarvaldinu þar sem úrskurðum þess verði ekki skotið til annars stjórnvalds.
Kjararáð verður lagt niður þann 1. júlí og mun því ekki taka neinar ákvarðanir eftir þann tíma.
Miðað við tímann sem það tók kjararáð að vinna úr beiðni Fréttablaðsins, er erfitt að segja til um hvort því gefist nægur tími til að verða við úrskurði ÚNU. Ef ekki, ætti það að vera á verksviði fjármálaráðuneytisins að afhenda gögnin.