Synjun kjararáðs á beiðni Fréttablaðsins um aðgang að fundargerðum hefur verið felld úr gildi af úrskurðarnefnd um upplýsingarmál (ÚNU) og beint því til kjararáðs að taka nýja ákvörðun í málinu. Þetta kemur fram í Fréttablaðinu.
Fréttablaðið óskaði eftir aðgangi að fundargerðum ráðsins frá tímabilinu 2008-2017 í nóvember 2017. Beiðnin var ítrekuð mánuði síðar ásamt því sem óskað var eftir bréfum þeirra sem í ráðinu sátu. Þeirri beiðni var hafnað þar sem hún þótti of víðtæk. Þá var ný beiðni lögð fram í í febrúar á þessu ári, þar sem óskað var eftir fundargerðum frá ársbyrjun 2013.
Svör bárust seint og illa og var því ákveðið að leita til ÚNU til að hafa milligöngu um málið. Kjararáð synjaði beiðninni í mars, á þeim forsendum að ráðið væri ekki stjórnvald og því næðu upplýsingalög ekki yfir störf þess.
Sú synjun var kærð af Fréttablaðinu sem kvað upp úrskurð sinn í gær, um að fella synjun kjararáðs úr gildi. Samkvæmt úrskurðinum skal kjararáð, lögum samkvæmt, fylgja ákvæðum upplýsingalaga í sínum störfum. Undir það falli að almenningur eigi rétt á aðgangi að gögnum í vörslu ráðsins.
Það sem gerir málið ennþá sérstakara, er að þann 1. júlí næstkomandi verður kjararáð ekki lengur til og því erfitt fyrir ráðið að taka afstöðu til málsins. Verður það þá væntanlega fjármálaráðuneytið sem þarf að svara fyrir málið eftir að tilurð kjararáðs lýkur.
Alþingi samþykkti þann 11. júní síðastliðinn að leggja ráðið niður, eftir að það þótti fara fram úr sér í launahækkunum til þeirra sem undir það féllu, frá ráðherrum til ríkisforstjóra og biskups.