Íris Róbertsdóttir, fyrrum varaþingmaður Sjálfstæðisflokksins, hefur samþykkt að leiða nýjan bæjarmálalista í Vestmannaeyjum. Þetta kom fram á Facebook síðu hennar í gærkvöldi.

„Ég hef ákveðið að verða við þeirri áskorun að gefa kost á mér til að leiða nýjan framboðslista hér í Vestmannaeyjum í sveitarstjórnarkosningunum í næsta mánuði. Ég er stolt og þakklát fyrir það traust sem mér er sýnt með þessari áskorun. Þessa ákvörðun hef ég tilkynnt forsvarsmönnum hins nýja bæjarmálafélags – Fyrir Heimaey.“

Íris hafði áður neitað því að vera einn af forsvarsmönnum listans, en sagðist þó áhugasöm um að mæta á stofnfund framboðsins sem haldinn var á fimmtudaginn í síðustu viku.

Um 200 manns skoruðu á Írisi að leiða listann með söfnun undirskrifta og virðist Íris hafa tekið þeirri áskorun.

Nafni Írisar hefur verið haldið á lofti frá því í febrúar, þegar mikil óánægja Sjálfstæðismanna kviknaði við það að hætt var við prófkjör hjá flokknum og fóru sögusagnir um klofningsframboð þegar að láta á sér kræla.