Í kvöld fer fram stofnfundur nýs bæjarmálafélags í Vestmannaeyjum. Aðdragandinn er „þung undiralda“ í bænum, að sögn Leós Snæs Sveinssonar sem kemur að stofnun hins nýja framboðs. Mikil óánægja Sjálfstæðismanna skapaðist þegar ákveðið var að hætta við prófkjör hjá flokknum í janúar, þó svo slíkt hefði ekki farið fram í 28 undanfarin ár. Heyrðust þá strax raddir um klofningsframboð, mögulega leitt af Írisi Róbertsdóttur, fyrrum varaþingmanni Sjálfstæðisflokksins.
Íris neitaði fyrir að vera forsvarsmaður framboðsins, en sagðist þó ætla að mæta á fundinn í kvöld.
Leó Snær sagði að Íris væri „stór vinkill“ hvað framboðið varðaði, þó svo hún væri ekki sú eina.
Nú hefur verið skorað á Írisi að leiða nýja framboðið og hafa um 200 manns sett nafn sitt við áskorunina á undirskriftalista þess efnis. Þetta kemur fram á vefmiðlinum Eyjar.net.
„Við skorum á Írisi Róbertsdóttur að leiða nýtt framboðsafl í Vestmannaeyjum”
segir í yfirskriftinni.
„Ræðum málin áður en ráðist er til framkvæmda, leggjum áherslu á lýðræðisleg vinnubrögð. Höfum fjölbreyttar skoðanir og vinnum saman, betur má ef duga skal,”
segir einnig á undirskriftarlistanum.
Fundurinn hefst klukkan 18.15.