Þetta er forsíða danska blaðsins Politiken frá því í dag. Zuckerberg á að skýra út pólitíska misnotkun á Facebook upplýsingum. Hvað annað?
Því hefur verið ljóstrað upp að 50 milljón Facebook prófílar hafi verið teknir traustataki og notaðir af hinu vafasama fyrirtæki Cambridge Analytics.
Forstjóri þess og hugmyndafræðingur hélt um daginn fyrirlestur í Reykjavík í boði Advania. Honum var víst vel fagnað enda er það því miður oft þannig í viðskptalífinu að vafasamt athæfi þykir flott – þ.e. ef menn komast upp með það. En þar sem Alexander Nix er annars vegar er ljóst að fundargestir hafa klappað fyrir siðleysingja. Samkvæmt nýjustu fregnum virðist hann líka vera glæpamaður.
Zuckerberg svarar auðvitað ekki neinu. Risafyrirtækið Facebook hafði heldur ekki fyrir því að tilkynna um þessa misnotkun. Það þarf uppljóstararann Christopher Wylie til að segja frá því. Zuckerberg felur sig bak við milljarða sína.
Samskiptamiðlar eru því miður að breytast í forarvilpu. Fyrirtæki sitja um að komast yfir upplýsingar um notendurna, flestir í hagnaðarskyni en sumir í pólitískum tilgangi. Facebook er útbíuð í fölskum fréttum og samsæriskenningaþrugli. Hún ruglar en upplýsir ekki.
Enn bætist svo við áreitið. Það eru svokallaðir áhrifavaldar. Þetta er fólk sem stundar misjafnlega dulda auglýsingastarfsemi á samskiptamiðlunum. Þannig þurrkast út mörkin milli mannlegra samskipta, auglýsinga og sölumennsku. Þetta gætu verið bestu vinir þínir sem eru að þiggja laun, þjónustu eða sporslur fyrir að segja þér að fara á ákveðinn veitingastað, versla við símafyrirtæki eða kaupa föt af einhverju tilteknu merki.
Lagalegur grunnur þessa er reyndar býsna óviss – en það eru haldnar fjöldasamkomur þar sem starfsemi af þessu tagi er kynnt sem eitthvað sérstaklega frábært og æskilegt, líkt og það sé partur af trúboði.
Hvað er til ráða? Auðvitað ætti maður að eyða Facebook-reikningnum eins og er lagt til í þessari grein og líka Instagram og Messenger enda ljóst að réttindi notenda eru virt algjörlega að vettugi.
