Orðið á götunni er að skrifað sé í skýin hver verði eftirmaður Gylfa Arnbjörnssonar í forsetaembætti ASÍ. Gylfi gaf það út í dag að hann hyggðist ekki gefa kost á sér til endurkjörs og virðist hafa gefist upp í baráttunni gegn Ragnari Þór og fleirum sem hafa gagnrýnt hann harðlega fyrir að tala ekki máli verkalýðsins.
Ljóst er að veljast þarf maður, eða kona, sem hafi nægilega sterkt bein í nefinu til að takast á við erfiða kjarasamninga í haust. Eitt nafn hefur skotið upp kollinum oftar en önnur á kaffistofum landsmanna í dag. Það er nafn Ögmundar Jónassonar, fyrrum ráðherra Vinstri grænna og formaður BSRB.
Ögmundur hefur það fram yfir marga að eiga feril bæði í verkalýðshreyfingunni og stjórnmálum og nýtur virðingar þvert á flokka. Enginn efast um að hann beri hag verkalýðsins fyrir brjósti og einnig ætti það að teljast honum til tekna, að hann hefur ekki lýst yfir afdráttarlausum stuðningi við ríkisstjórnina.
Ögmundur verður að vísu orðinn sjötugur þegar kemur að forsetakjöri ASÍ, en hann þykir þó halda sér gríðarlega vel.
Þá má geta þess, að Gunnar Smári Egilsson, stofnandi Sósíalistaflokks Íslands, segist ekki ætla að gefa kost á sér til embættisins, en framboð hans hefði orðið að teljast nokkuð langsótt.