Orðið á götunni er að hamagangurinn á þingi undanfarið sé farinn að taka sinn toll. Hæst hefur á góma borið veiðigjaldafrumvarpið, sem varð tilefni mikillar geðshræringar þingmanna stjórnarandstöðunnar, þar sem VG hafði tekið, að þeim fannst, ólöglega U-beygju í málinu. En auðvitað er stjórnmálaflokkum frjálst að skipta um skoðun, líkt og mannfólkinu.
Forseti Alþingis, Steingrímur J. Sigfússon, Vinstri grænum, gegnir einnig öðru forsetaembætti á sínum vinnustað, en hann er einnig aldursforseti þingsins, 63 ára. Hann fær þó ekkert greitt aukalega fyrir það, svo vitað sé. Hinsvegar er spurning hvort því ætti að breyta, þar sem starf forseta getur reynst nokkuð líkamlega erfitt, að því er virðist.
Hvort aldrinum sé um að kenna, rangri handabeitingu eða þingmönnum sem tala framyfir tíma sinn í pontu, með tilheyrandi hamarshöggum forseta skal ósagt látið, en alltént þurfti Steingrímur að gangast undir aðgerð í síðasta mánuði vegna álagsmeiðsla og er því með höndina í fatla.
Orðið á götunni er að um svokallaðan fundahamarsolnboga sé að ræða, sem ekki skal ruglað við tennisolnboga, þó svo einkennin séu þau sömu.