Óhætt er að segja að Vinstri græn beri titilinn taparar kosninganna í gær, hrakleg niðurstaða flokksins í Reykjavík, Kópavogi og Hafnarfirði segir allt sem segja þarf í þeim efnum.

Þess vegna var ekki óeðlilegt, að Egill Helgason sjónvarpsmaður skyldi spyrja Líf Magneudóttur, oddvita VG í borginni, í Silfrinu í morgun hvort hún væri að íhuga stöðu sína.

VG fékk 4,6% í kosningunum, tapaði næstum helmingi síns fylgis frá síðustu kosningum og fékk verstu útkomu í sögu flokksins þegar kemur að borgarstjórn Reykjavíkur.

Orðið á götunni er að önnur stjórnmálakona hljóti einnig að íhuga stöðu sína eftir kosningaúrslit næturinnar. Það er Katrín Jakobsdóttir forsætisráðherra, sem sá með berum hætti hvers konar tjón það er fyrir flokkinn að hafa myndað ríkisstjórn með Sjálfstæðisflokknum og Framsókn.

Þekkt er að Halldór Ásgrímsson sagði af sér sem forsætisráðherra eftir sveitarstjórnarkosningar 2006 og axlaði þannig ábyrgð á slæmri stöðu Framsóknarflokksins í kosningunum. Samt var niðurstaðan fyrir Framsókn þá ekki verri en fyrir Vinstri græn nú.

Spurningin er: Mun Katrín Jakobsdóttir axla sína ábyrgð og segja af sér? Að minnsta kosti er ljóst að forystuflokkurinn í ríkisstjórn er það aðeins að nafninu til eftir tíðindi næturinnar. VG hefur ekki lengur lýðræðislegt umboð til að halda stóli forsætisráðherra, það gefur auga leið.