Orðið á götunni er að Ármann Kr. Ólafsson, bæjarstjóri Kópavogs, og oddviti Sjálfstæðisflokksins, muni ekki fá mörg atkvæði frá stuðningsmönnum Handknattleiksfélags Kópavogs á morgun, kjördag. Þá eru femínistar og unnendur húmors sagðir ætla að sniðganga lista Sjálfstæðisflokksins einnig.
Ástæðan er sú að um alnetið fer nú líkt og eldur í sinu, upptaka frá ræðu Ármanns á herrakvöldi Breiðabliks frá því í febrúar. Á slíkum skemmtikvöldum ríkir gjarnan afar karllæg stemmning, oft kennd við hrúta, þar sem ýmislegt er látið flakka sem allajafna engin myndi vilja kannast við að hafa látið út úr sér á opinberum vettvangi.
Samkvæmt upptökunni segir Ármann tvo brandara. Hvorugur er sérstaklega góður, en sá skárri hljómar svo:
„Vitið þið muninn á Bill Clinton og HK ? Bill Clinton hittir í mark, ekki HK.“
Þá virðist Ármann koma auga á mann í salnum sem hann segir vera HK-ing. Virðist nærvera HK-ingsins misbjóða siðferðiskennd Ármanns, því hann segir hátt og snjallt:
„Hvurn andskotann eru HK-menn að gera hérna! ? Viljið þið henda honum út úr salnum. Þetta er flugumaður! Drífðu þig út! Það þýðir ekkert að koma hingað og væla eins og einhver kelling.“
Orðið á götunni er að í dag muni nýtt kosningaloforð frá Sjálfstæðisflokknum líta dagsins ljós, þar sem HK verði lofað gulli og grænum skógum.
Upptökuna má sjá hér að neðan.