Í kjölfar gjaldþrot ferðaskrifstofunnar Super Break gætu ferðaþjónustufyrirtæki á Norðurlandi orðið af hálfum milljarði. Ferðaskrifstofan ætlaði að fljúga til Akureyrar í vetur og var búið að seglja helming þeirra flugsæta sem voru í boði. Um mikla blóðtöku er að ræða að sögn framkvæmdastjóra Markaðsstofu Norðurlands.

„Það er búið að leggja peninga í markaðssetninguna og við erum að skoða að fá nýja aðila að borðinu. Við vorum að fara inn í þriðja árið með Super Break og því hefur komið ágætis reynsla á þetta flug.“

Er haft eftir Arnheiði Jóhannesdóttur, framkvæmdastjóra Markaðsstofu Norðurlands, í umfjöllun Fréttablaðsins um málið í dag. Hún sagði þetta mikið högg fyrir fyrirtækin á svæðinu. reiknað sé með að um 9.000 gistinætur geti tapast í febrúar og mars vegna gjaldþrotsins og þar sé um mikla veltu að ræða á þessum árstíma vegna árstíðasveiflna í ferðaþjónustu á svæðinu.

Hún sagðist vonast til að markaðssetningin hafi skilað sér til fleiri aðila og að önnur fyrirtæki séu reiðubúin til að koma að málum varðandi flug á milli Akureyrar og meginlands Evrópu eða Bretlandseyja.