„Flestir greiningaraðilar eru sammála um að veturinn verður rekstraraðilum þungur, þá sérstaklega þeim sem þjónusta ferðamenn. Við höfum nú þegar séð fréttir af veitingastöðum í Reykjavík sem leggja upp laupana í hrönnum, jafnvel staði sem átt hafa fastan stað í borginni í fjölda ára,“ segir Katrín Atladóttir, borgarfulltrúi Sjálfstæðisflokksins, í nýrri grein í Fréttablaðinu í dag.
Katrín hefur áhyggjur af stöðu lítilla og meðalstórra fyrirtækja í borginni. Hún bendir á að þessi hluti fyrirtækjamarkaðarins skapi 73% starfa á almennum vinnumarkaði og greiði 69% af laununum. Háir skattar og íþyngjandi reglur geri rekstur þeirra hins vegar erfiðan.
Katrín tekur saman þau vandamál sem smærri fyrirtæki í borginni glíma við núna:
„Vandinn er margþættur. Rekstraraðilar nefna langar kjaraviðræður og miklar launahækkanir. Hækkun á hráefniskostnaði, fækkun ferðamanna, framkvæmdir, slæma upplýsingagjöf frá Reykjavíkurborg, þunga og svifaseina stjórnsýslu og slæmt aðgengi. Íþyngjandi regluverk og flókna skriffinnsku, tafir við að fá rekstrarleyfi. Framkvæmdir sem dragast á langinn leiða til þess að enginn kemst um, hvorki akandi né gangandi, og verulegur skortur er á samráði við rekstraraðila.“
Katrín bendir síðan á að álagningarprósenta fasteignaskatts í Reykjavík sé í lögbundnu hámarki. Meirihlutinn í borginni hafi fellt tillögu Sjálfstæðisflokksins um að lækka fasteignagjöld:
„Ríflega helmingur af verðmæti atvinnuhúsnæðis landsins er í Reykjavík. Þar er álagningarprósenta fasteignaskatts í lögbundnu hámarki. Hækkun á fasteignamati atvinnuhúsnæðis á höfuðborgarsvæðinu nemur ríflega 65% frá árinu 2014 til 2019. Fyrirtækin í borginni hafa ekki notið vaxtar í rekstri sínum í líkingu við hækkun fasteignagjalda undanfarin misseri. Fasteignagjöld eru langstærsti útgjaldaliður félaga sem leigja út atvinnuhúsnæði, um 70% af rekstrarkostnaði þeirra. Þessi hækkun á fasteignamati síðustu ára leiðir til hækkunar leiguverðs. Meirihlutinn felldi tillögu Sjálfstæðisflokksins um að lækka þá strax á þessu ári.“
Katrín segir margþættan vanda steðja að fyrirtækjum í Reykjavík og mótvægisaðgerðir séu nauðsynlegar strax. Borgin geti brugðist við vanda fyrirtækjanna og létt undir með þeim með því að bæta upplýsingagjöf, auka samráð við rekstraraðila varðandi framkvæmdir í borginni, einfalda ferla og lækka skatta.
