Fyrir tveimur vikum samþykkti fulltrúaráð VR að afturkalla umboð þeirra fjögurra stjórnarmanna sem félagið skipar í stjórn LIVE og tilnefna nýja í þeirra stað. Þetta voru viðbrögð við ákvörðun stjórnar LIVE um að hækka vexti á breytilegum verðtryggðum húsnæðislánum til sjóðsfélaga. Stjórn VR taldi þá ákvörðun vera trúnaðarbrest og gengi gegn markmiði kjarasamninga. Fréttablaðið skýrir frá þessu.
Stjórnarmennirnir sögðu svo ekki vera og sögðu að hækkunin næði til lítils hóps lántakenda sem aðrir sjóðsfélagar væru að niðurgreiða lán fyrir því þau væru með of lágum vöxtum.
„Ef ákvörðun um afturköllun á tilnefningu stjórnarmanna lífeyrissjóðsins og skipun nýrra aðila af hálfu VR byggð á framangreindum sjónarmiðum VR frá 18. júní síðastliðinn nær fram að ganga megi líta svo á að um tilraun til beinnar íhlutunar í stjórn lífeyrissjóðsins sé að ræða.“
Segir í áliti FME vegna málsins og að með óbeinum hætti væri ætlunin að færa ákvörðunarvaldið frá stjórn LIVE. Það vegi að sjálfstæði stjórnarinnar og góðum stjórnarháttum.
Fréttablaðið hefur eftir Jóni Þór Sturlusyni, aðstoðarforstjóra FME, að það sé mat FME að gamla stjórn LIVE hafi enn fullt umboð. Ekki hafi verið rétt staðið að afturkölluninni og ný skipan hafi því ekki tekið gildi.