Samkvæmt nýrri könnun sem Zenter rannsóknir gerðu fyrir Fréttablaðið og fréttablaðið.is um jarðakaup Íslendinga eru 55,6% aðspurðra mjög sammála því að reglur um jarðakaup útlendinga verði hertar. 28% eru því frekar sammála.
Þátttakendur voru spurðir: „Hversu sammála eða ósammála ertu því að stjórnvöld ættu að setja frekari skorður/kröfur við jarðakaupum erlendra aðila á Íslandi?“
Eins og fyrr sagði er afgerandi meirihluti fylgjandi hertum reglum. 11,3% sögðust hvorki fylgjandi þessu né á móti. 3,5% voru þessu frekar ósammála og 1,6% voru mjög ósammála.
„Þessar niðurstöður koma mér ekkert á óvart eftir umræðuna og þau samtöl sem ég hef átt við fjölmarga aðila um allt land á liðnum mánuðum, misserum og jafnvel árum. Ég hef lengi verið þeirrar skoðunar að við þurfum að vera skýrari og ganga lengra en við hefðum kannski gert bara fyrir sex árum. Við þurfum að setja skýr viðmið um hvað okkur finnst eðlilegt og hvað ekki.“
Er haft eftir Sigurði Inga sem sagðist fagna því að svona mikill stuðningur mælist við áform stjórnvalda um að herða reglur um jarðakaup útlendinga. Þau hafa verið töluvert í umræðunni að undanförnu en erlendir aðilar eru taldir eiga um 60 jarðir hér á landi. Enski auðkýfingurinn James Ratcliffe er umsvifamestur þeirra en félög tengd honum eru talin eiga 30 til 40 jarðir á Norðausturlandi.
