Fréttablaðið skýrir frá þessu í dag. Þar er haft eftir Šmakal að dagar smálána með allt að 3.000% vöxtum séu nú liðnir hjá fyrirtækinu. Frá því í maí hafi vextirnir hjá fyrrgreindum fyrirtækjum Kredia Group lækkað niður í 53,75% sem eru hæstu leyfðu vextir samkvæmt lögum. Þetta þýðir að sögn Šmakal að ef lántakandi tekur 20.000 krónur að láni þá greiðir hann 20.719 krónur ef hann greiðir lánið innan við mánuði eftir að það er tekið.
Haft er eftir Gísla Kr. Björnssyni, lögmanni og stjórnanda Almennrar innheimtu, sem sér um innheimtu hér á landi fyrir smálánafyrirtækin, að hætt sé að innheimta lán sem bera hærri vexti en 53,75%. Hann sagði jafnframt að engin eldri lán séu nú í innheimtu.
„Það var að kröfu Almennrar innheimtu að þessum lánum var breytt og við höfum útvegað allar sundurliðanir sem við höfum getað og verið beðin um.“
Er haft eftir Gísla.
Fréttablaðið hefur eftir Brynhildi Pétursdóttur, framkvæmdastjóra Neytendasamtakanna, að jákvætt sé að þessi smálán heyri sögunni til.
„Ef það er raunverulega svo að Almenn innheimta er loksins að hætta innheimtu á ólögmætu smálánunum þá auðvitað fögnum við því, enda tími til kominn, og við væntum þess að ólögmætar kröfur verði látnar niður falla.“
Er haft eftir henni.