Geir Finnsson, fyrrverandi formaður Ungra Evrópusinna gagnrýnir áróður sem birtist í Facebook-hópnum Orkan okkar baráttuhópur, þar sem orkumál Íslands eru rædd.
Geir gagnrýnir færslu sem birtist í morgun þar sem auglýsing ungmenna sem styðja áframhaldandi aðild Íslands að EES-samningnum er breytt þannig að þeim er snúið á hvolf.
„Það finnst mér sérstaklega miður að þarna var ekki í fyrsta skipti notuð auglýsing þar sem myndir af um þrjú hundruð ungu fólki sem mótmælti því að ráðskast skuli með alþjóðasamninga á borð við EES-samninginn, að það sé verið að stofna framtíð okkar í einhverja óþarfa hættu.“ Segir Geir í samtali við DV.
„Þessi auglýsing okkar er þarna notuð í þessari grúbbu, þarna er hún skopstæld og breytt gegn okkur. Auglýsingunni er breytt þannig að hún verður áróður gegn þriðja orkupakkanum.“
„Ég vakti athygli á þessu á Twitter og þar tóku ansi margir undir að þetta væri hreinlega ekki boðlegt,“
Þegar Geir var spurður nánar út í færsluna sagði hann „Það kæmi mér ekki á óvart að það væri verið að reyna að gera lítið úr þessu uppátæki. Staðreyndin er samt sú að það virðist ekki vera mikið til af ungu fólki sem styður málstað Orkunnar Okkar,“
Geir segir að Orkan Okkar hafi birt svipaða auglýsingu og stuðningsmenn EES-samningsins nema með ungu fólki sem var andstætt þriðja orkupakkanum. Geir bendir á að sú auglýsing hafi sýnt talsvert færri einstaklinga og að sumir þeirra myndu ekkert endilega flokkast sem ungt fólk.
Þá gagnrýnir hann líka baráttuhóp Orkunnar Okkar sem hann telur vera fátt meira en áróðurshóp.
„Ég skráði mig upphaflega í hópinn haldandi að þarna væri verið að ræða orkuöryggi og sjálfstæði okkar Íslendinga er varðar orkumál. Svo þegar tíminn leið tók ég eftir því að þetta var í raun bara áróðurshópur gegn innleiðingu þriðja orkupakkans á Íslandi og eftir því sem ég fylgist meira með umræðunni þá hef ég tekið eftir því að þarna er bara linnulaus áróður,“
„Þarna er fólki einfaldlega hent út ef það kemur með skoðanir sem stangast á við hópinn.“
Geir telur ekki ólíklegt að höfðað verði mál vegna færslunnar, þar sem hún kynni að teljast sem einhverskonar höfundarréttarbrot. Hann telur þó ólíklegt að meðlimir hópsins Orkan okkar baráttuhópur muni hætta að breyta auglýsingunni á þennan hátt, þar sem það hafi verið gert áður.
