Héraðsdómur Reykjaness komst að þeirri niðurstöðu í morgun að bandaríska leigufélaginu ALC bæri einungis að greiða þær skuldir sem hvíldu á WOW þotunni, sem kyrrsett hefur verið á Keflavíkurflugvelli síðustu mánuði.  Um er að ræða tæpar 90 milljónir króna.

Málið hefur verið að velkjast í dómskerfinu í nokkurn tíma. ISAVIA taldi að ALC bæri að greiða allar skuldir WOW við flugvöllinn, en forsvarsmenn ALC töldu að viðmiðið ætti að vera þær skuldir sem bundnar væru við viðkomandi flugvél. Í kjölfarið kyrrsetti ISAVIA vélina, sem blasað hefur við öllum sem leggja leið sína á flugvöllinn.

RÚV hafði eftir Oddi Ástráðssyni, lögmanni ALC, í morgun að þó ISAVIA kunni að láta reyna á málið  fyrir Landsrétti, þá fresti það ekki réttaráhrifum úrskurðarins, og því geti ALC tekið þotuna strax. Jafnframt verði möguleg skaðabótaskylda ISAVIA skoðuð.