Vísitala íbúðaverðs á höfuðborgarsvæðinu hækkaði um 0,2% á milli maí og júní samkvæmt nýbirtum tölum Þjóðskrár Íslands. Árshækkun vísitölu íbúðaverðs mælist nú 3,2% samanborið við 3,9% árshækkun í  maí og 5,2% í júní í fyrra, samkvæmt tilkynningu frá Íbúðalánasjóði.

Raunverð íbúða á höfuðborgarsvæðinu (þ.e. vísitala íbúðaverðs í hlutfalli við vísitölu neysluverðs) lækkaði um -0,2% milli mánaða og í fyrsta sinn frá því í maí 2012 mælist smávægileg raunverðslækkun á milli ára. Að teknu tilliti til verðbólgu mælist nú nánar tiltekið um 0,2% lækkun í vísitölu íbúðaverðs á höfuðborgarsvæðinu frá sama mánuði 2018.

Verð fjölbýlis hækkaði um 0,3% milli maí og júní en hins vegar mælist um 0,5% lækkun á milli mánaða á íbúðum í sérbýli. Verð fjölbýlis hefur hækkað um 3,4% frá júní í fyrra samanborið við 3,8% í maí og 3,7% í júní 2018. Tólf mánaða hækkunartaktur sérbýlis mælist nú um 1,8%, samanborið við 4,4% í maí og 9,3% í júnímánuði í fyrra.

Íbúðaverð á höfuðborgarsvæðinu hefur á undanförnum tveimur árum fylgt nokkuð stöðugt hinni almennu launaþróun eftir nokkuð snarpar verðhækkanir frá síðri hluta árs 2016 og fram á mitt ár 2017.

Á fyrri helmingi ársins hefur alls 3.404 kaupsamningum verið þinglýst um íbúðir á höfuð-borgarsvæðinu. Það er um 4% fækkun kaupsamninga frá janúar-júní 2018 þegar 3.546 kaupsamningum var þinglýst. Veltuaukning mælist um 1,2% yfir sama tímabil á verðlagi hvers árs, sem er um 1,9% samdráttur á föstu verðlagi.