Jón Karl Ólafsson fyrrverandi framkvæmdastjóri ISAVIA og Icelandair segir hugmyndir um tvö ný lággjaldaflugfélög hérlendis snúist fyrst og fremst um sjálfbærni. Markaðurinn sé þröngur fyrir þetta mikla magn af flugi og ekki megi gleyma því að WOW Air skilaði engum hagnaði. „Þetta er spurning um hvor aðilinn verður á undan. Tvö viðbótaflugfélög eru aldrei að fara að bætast við hérlendis,“ segir Jón Karl í samtali við DV. „Þetta er spurning um hvort hægt er að koma upp raunhæfu rekstrarmódeli.“
Hann segir að ef þessi nýju flugfélög ætli að byggja á þessum markaði, með flug til og frá Íslandi, þá verði þau að vera með miðstöð á Íslandi. Þau verði alla vega að vera með talsverða starfsemi hérlendis. Það þýði þó ekki að flestir starfsmenn verði innlendir, enda sé frjálst flæði vinnuafls milli landa. Hins vegar verði að gera ráð fyrir að menn vilji skoða opnari samninga við starfsmenn og að vandamálið hérlendis snúi frekar að nýtingu starfsfólks en launatölum.
„Ég held að menn muni reyna einu sinni enn að koma upp nýju flugfélagi hérlendis,“ segir Jón Karl. Ekki mega gleyma því að fjölmargir erlendir fjárfestingasjóðir séu tilbúnir með mikið fjármagn til að setja í áhættufjarfestingar. Þá séu reynslumiklir menn á bak við hugmyndina um WAB Air, þannig að það sé ekki útilokað að þeim takist ætlunarverk sitt. Minna sé vitað um Bandaríkjamennina sem komu fram í sviðsljósið í morgun.
Þá telur hann að bandarísku aðilarnir, sem keypt hafa flugrekstrarbúnað, bókunarkerfi, tölvur og lén, muni reka nýtt félag undir merki WOW Air. Hann bendir að að það sé eina rökrétta skýringin á því að þeir skuli hafa fjárfest í lénum WOW.