Fréttablaðið skýrir frá þessu í dag. Fram kemur að írski sjóðurinn Avianta Capital, sem er í eigu Aislinn Whittley-Ryan sem er dóttir eins af stofnendum Ryanair, hafi skuldbundið sig til að leggja nýja félaginu til 40 milljónir dala en það jafngildir um fimm milljörðum króna. Þetta fé á að duga til að tryggja rekstur félagsins í þrjú ár. Nýja félagið hefur fengið heitið WAB air.
Ásamt írska sjóðnum tekur félagið Neo þátt í verkefninu en það er í eigu Arnars Más Magnússonar, fyrrverandi framkvæmdastjóra flugrekstrarsviðs WOW air, Sveins Inga Steinþórssonar, sem stýrði hagdeild WOW air, Boga Guðmundssonar, lögmanns, og Þórodds Ara Þóroddssonar, sem hefur starfað sem ráðgjafi í flugvélaviðskiptum.
Hópurinn er sagður hafa leitað til að minnsta kosti tveggja íslenskra banka og óskað eftir að fá 31 milljón evra, sem svarar til um fjögurra milljarða króna, að láni. Lánið á að nýta sem eigið fé til að fá lán hjá svissneskum banka.
Avinta Capital mun eignast 75% hlut í félaginu á móti 25% hlut Neo.
Samkvæmt minnisblaði, sem Markaður Fréttablaðsins hefur undir höndum, um áform fjárfestanna kemur fram að félagið eigi að hefja rekstur í haust og verði með sex vélar í rekstri fyrsta árið og er stefnt að flugi til fjórtán áfangastaða í Evrópu og Ameríku. Gert er ráð fyrir flytja eina milljón farþega á næsta ári og að 500 starfsmenn verði ráðnir til félagsins á næstu mánuðum.