Fylgi Miðflokksins mælist nú 9,8% og bætir flokkurinn rúmlega þremur prósentustigum við sig á milli kannana. Framsóknarflokkurinn mælist með 7,1% fylgi og tapar 2,1 prósentustigum á milli kannana. Af stjórnarflokkunum eru það bara Vinstri græn sem bæta við sig fylgi en flokkurinn mælist nú með 13,1% en var með 10,2% í síðustu könnun.

Fréttablaðið skýrir frá þessu í dag en Zenter rannsóknir gerðu könnunina fyrir Fréttablaðið í vikunni.

Fylgi Sjálfstæðisflokksins mælist nú 22,6% en mældist 24,2% síðast. Fylgi við ríkisstjórnina breytist lítið en þó segjast mun fleiri ekki vita hvort þeir styðja stjórnina.

Píratar sækja í sig veðrið og bæta við sig rúmum tveimur prósentum frá síðustu könnun og fara í 15,2% úr 13%. Píratar eru því stærsti stjórnarandstöðuflokkurinn og næststærsti flokkur landsins.

Samfylkingin mælist með 14,1% en mældist með 17,4% í síðustu könnun. Fylgi Viðreisnar breytist lítið, mælist nú 9,7% en var 9,9% í síðustu könnun.

Flokkur fólksins tapar einu prósentustigi á milli kannana og mælist nú með 4,3% fylgi en mældist með 5,3% síðast.

Könnun var gerð 25. til 27. júní og var send á 2.000 manna könnunarhóp Zenter rannsókna, 18 ára og eldri. Svarhlutfallið var 51%.