Forsætisnefnd Alþingis hefur fallist á niðurstöðu siðanefndar þingsins um að Þórhildur Sunna Ævarsdóttir, þingkona Pírata, hafi brotið siðareglur þingmanna með ummælum sínum um Ásmund Friðriksson þingmann Sjálfstæðisflokksins. Álit siðanefndarinnar var afgreitt á fundi forsætisnefndar á föstudaginn eftir að þingstörfum lauk. Álitið verður birt á vef Alþingis í dag.

Fréttablaðið skýrir frá þessu í dag.

Ummælin, sem um ræðir, lét Þórhildur Sunna falla í Silfrinu á RÚV í febrúar í fyrra. Þar sagði hún að rökstuddur grunur væri uppi um að Ásmundur hefði dregið sér fé í tengslum við endurgreiðslur sem hann fékk frá Alþingi á grundvelli akstursdagbókar.

Fréttablaðið segir að í áliti siðanefndar segi að það sé ekki tilgangur siðareglnanna að takmarka tjáningarfrelsi þingmanna en af þeim leiði að það geti haft þýðingu hvernig tjáning er sett fram og við hvaða aðstæður. Siðareglurnar lúti því ekki að efni tjáningarinnar heldur að ytri búningi hennar, til dæmis háttvísi og aðferð.

Nefndin hafnar athugasemdum Þórhildar Sunnu um að rétt væri að siðanefndin legði mat á sannleiksgildi ummæla hennar og því ætti að vísa málinu aftur til siðanefndarinnar til meðferðar. Forsætisnefnd telur sig ekki fara með úrskurðarvald um sannleiksgildi ummæla sem hún fær til skoðunar á grundvelli siðareglna. Þrír nefndarmenn í forsætisnefnd skiluðu sérstakri bókun um niðurstöðuna.