Stytting vinnuvikunnar hefur reynst Reykjavíkurborg vel. Starfsánægja er meiri og álag á starfsmönnum minna. Þetta kemur fram í nýrri skýrslu um tilraunarverkefni um styttingu vinnuvikunnar sem lögð var fyrir borgarráð í gær.
Borgarstjórn samþykkti árið 2014 að stofna starfshóp til að útfæra tilraunarverkefni um styttingu vinnuvikunnar án launaskerðingar. Markmiðið var að kanna áhrif styttingunnar á heilsu, vellíðan, starfsanda og þjónustu. Í fyrsta áfanga verkefnisins var valinn starfsstaður á sviði velferðar þar sem starsfólk var undir miklu álagi.
Niðurstöður úr viðhorfskönnun sýndu á þesum starfsstöðvum jók styttingin starfsánægju og sveigjanleika í starfi og álag á starfsmönnum varð minna. Í tilkynningu frá Reykjavíkurborg segir:
„Í ljós kom að stytting vinnuvikunnar hafði jákvæð áhrif á almenna líðan starfsmanna. Jafnframt voru þátttakendur í tilraunahópi líklegri til að eiga sjaldnar við vinnutengt álag að stríða en samanburðarhópur og það dró úr líkamlegum álagseinkennum hjá þeim sem fengu styttingu. Þátttakendur í tilraunahópi upplifðu betri starfsanda á vinnustað og fundu fyrir meira jafnvægi á milli vinnu og einkalífs.“
Þrátt fyrir styttinguna hafa afköst ekki minnkað. Að auki hafði yfirvinna ekki aukist á móti styttingunni.
Rannsóknar- og þróunarmiðstöð Háskólans á Akureyri kannaði áhrif styttingunnar á fjölskyldu líf og samspil vinnu og einkalífs. Þar bentu niðurstöður til að stytting auðveldi barnafjölskyldum að samrææma vinnu og einkalíf sem og minnkar álag á heimili. Samverustundir fjölskyldunnar urðu fleiri og þátttakendur upplifðu sig afspallaðri, rólegri og í betri samskiptum við vinnufélaga og fjölskyldumeðlimi.