Nýverið gekk í gildi lögreglusamþykkt fyrir sveitarfélög í umdæmi lögreglustjórans á Norðurlandi vestra. Er þetta fyrsta lögreglusamþykktin sem nær yfir öll sveitarfélög á þessu svæði, samkvæmt tilkynningu á vef Skagafjarðar.
Í lögreglusamþykktinni er víða leitað fanga, ef svo má að orði komast, en þar er til dæmis kveðið á um að bannað sé að meðhöndla vatn í frosti við einhverskonar þrif utandyra, að bannað sé að kúka og pissa á almannafæri og ekki megi troða niður blómabeð.
Um er að ræða nokkuð rótgrónar og hefðbundnar reglur er varða kurteisi og almenna skynsemi, og byggir hún á öðrum lögreglusamþykktum á Íslandi sem eru nánast allar eins orðaðar.
Ein grein í lögreglusamþykktum landsins gæti talist athyglisverð þegar hún er sett í samhengi við hegðun Íslendinga þegar kemur að því að mynda raðir, sem virðist landlægt vandamál.
Fimmta greinin hljóðar svo:
„Þegar fjölmenni safnast saman á almannafæri svo sem í eða við biðstöðvar almenningsvagna og leigubifreiða, miðasölur, banka, veitingastaði, verslanir eða aðra afgreiðslustaði, skal fólk að jafnaði taka tillit til þess að þeir sem fyrstir koma fái fyrstir afgreiðslu.“
Með öðrum orðum þá er bannað að ryðjast, hafi það vafist fyrir einhverjum hingað til.
Í lögum um lögreglusamþykktir er tekið fram að brot gegn þeim varði sektum og ef kenna megi yfirsjón barns skorti á hæfilegri umsjá foreldris eða þess sem gangi barninu í stað foreldris, skuli refsa þeim fyrir yfirsjón barnsins.
Lagalega séð má því lögreglan sekta þá sem ryðjast framfyrir röðina í kvikmyndahúsi, á fótboltaleik, tónleikum, á útsölum verslana eða við inngang skemmtistaða, hvort sem um ræðir börn eða fullorðna.
Þó svo biðraðamenning Íslendinga hafi batnað nokkuð á síðari árum, má telja ljóst að sektarheimildir lögreglu í þessum efnum eru vannýttar og svigrúmið fyrir aukinni innheimtu ríkissjóðs hleypur á tugum milljóna á ári.
