Ágreiningur innan Sjálfstæðisflokksins snýst um eldri meðlimi sem fóru áður með völd og eru ekki tilbúnir að sleppa takinu af þeim þrátt fyrir að hafa formlega stigið úr sviðsljósinu. Þetta kom fram í samtali almannatenglanna Andrésar Jónssonar og Friðjóns Friðjónssonar, í Bítinu á Bylgjunni í morgun.
Almannatenglarnir tveir voru fengnir í þáttinn til að svara spurningunni um hvort Sjálfstæðisflokkurinn væri að liðast í sundur. Davíð Oddsson, ritstjóri Morgunblaðsins og fyrrverandi formaður Sjálfstæðisflokksins, hefur gagnrýnt núverandi forystu flokksins harðlega í Reykjavíkurbréfum sínum og kom það jafnframt mörgum á óvart þegar afmælisgrein Bjarna Benediktssonar á 90 ára afmæli Sjálfstæðisflokksins birtist í Fréttablaðinu, en margir töldu það lítt dulbúið skot á Davíð.
Andrés Jónsson og Friðjón Friðjónsson voru báðir sammála um að ofangreindar deilur þýði ekki að Sjálfstæðisflokkurinn sé að klofna. „Stutta svarið er nei,“ sögðu báðir.
„Þetta er kannski ágreiningur sem er að koma upp á yfirborðið milli Davíðs, sem er fyrrum sterkasti formaður flokksins, sem vill hafa áfram ítök og er ekki ánægður sín ítök greinilega. Og það hefur verið óopinbert leyndarmál að hann hefur verið að pota í Bjarna reglulega. En nú finnst mér það vera komið alveg upp á yfirborið í rauninni hversu slæmt samband milli þessa fyrrverandi formanns og núverandi formanns í rauninni er,“
segir Andrés.
Hann segir Davíð Oddsson velja það úr sögu flokksins sem henti málflutningi hans. Davíð, sem sjálfur hafi slegið varnagla gegn því að hlusta of mikið á grasrót Sjálfstæðisflokksins á sínum tíma, nýti núna grasrótina til að styðja við eigin málflutning og gagnrýni gegn sitjandi forystu.
„Í grunninn skynja ég, þegar maður skoðar þetta og það sem hefur verið að gerast á síðust árum. Davíð situr í Morgunblaðinu og vill í rauninni stýra svolítið sínum eigin flokki og vera svona smá formaður til eilífðarnóns. Og unnið Bjarna. Og honum finnst greinilega ekki nógu mikið á sig hlustað.“
„Ég held að slagurinn sé löngu byrjaður. Og Bjarni Ben virðist vera ófeimnari núna að leyfa þessum slag að koma upp á yfirborðið“
Friðjón telur Bjarna Benediktsson ekki hafa sent Davíð Oddssyni sneið með því að birta afmælisgrein Sjálfstæðisflokksins í Fréttablaðinu fremur en í Morgunblaðinu.
„Ég held að það sé óumdeilt að Fréttablaðið er með meiri lesningu. Tæp 80 prósent búa hérna á suðvestur horninu. Fréttablaðið er bara með meiri dreifingu, meiri lestur, þetta er ekki flóknari en það,“ sagði Friðjón og bætti því við að Morgunblaðið hafi ekkert sérstakt gert fyrir Sjálfstæðismenn undanfarin ár. „Ég held að það séu ótrúlega margir Sjálfstæðismenn sem eru ekki áskrifendur að Morgunblaðinu.“
Friðjón er sammála Andrési með það að Davíð virðist velja sér röksemdarfærslur eftir hentisemi. Davíð gagnrýndi í Reykjavíkurbréfi sínu um helgina að núverandi forysta flokksins fylgdi ekki ályktunum landsfunda. Friðjón segir það nokkuð algengt.
„Ég fór á minn fyrsta landsfund 95 og ég minnist þess aldrei og ég gagnrýndi þegar ég var í forystu ungra sjálfstæðismanna fyrir fáránlega mörgum árum síðan, miðað við hvað ég er ungur finnst mér, að forystan fylgdi ekki. Það á við um Davíð Oddsson, það á við um Geir H. Haarde.“
„Mér finnst holur hljómur í gagnrýni manna sem hafa setið í þessari stöðu að halda svona fram. “
Davíð gagnrýndi einnig varaformann flokksins, Þórdísi Kolbrúnu Reykfjörð Gylfadóttur og kallaði hana reynslulitla. Andrési fannst það undarlegt, þar sem Þórdís væri ástsæl innan flokksins og líklegur arftaki Bjarna Benediktssonar. Davíð sjálfur hafi vel geta talist reynslulítill þegar hann komst til valda í Sjálfstæðisflokknum.
„Það kemur mjög á óvart, hann nefnir hana ekki einu sinni nafni í bréfinu heldur talar í gátum um hana sem er sennilega ákveðin tilraun til virðingarleysis.“
Það er vel þekkt staðreynd, segir Andrés, að Guðlaugur Þór Þórðarson, þingmaður Sjálfstæðisflokksins, vill taka við flokknum þegar Bjarni stígur til hliðar. „Bjarni vill ekki að Guðlaugur taki við af sér,“ segir Andrés sem segir margt af því sem landsmenn eru að verða vitni af núna sé birtingarmynd af þeim átökum.
Friðjón er sammála og bendir á fjölda Sjálfstæðismanna sem hafi tekið við völdum tiltölulega ungir og reynslulausir. Þetta sé í raun rík hefð innan flokksins sem hafi reynst vel.
„Að tala um reynsluleysi, mér finnst þetta svo mikið PÍP, afsakið orðbragðið, því í rauninni hefur Sjálfstæðisflokkurinn mikla og góða reynslu af því að treysta fólki sem er í yngri kantinum, að stíga upp og leiða flokkinn.“
Samkvæmt Andrési má sjá þess merki að kynslóð Davíðs Oddssonar, sem hafði mikil völd um áratugaskeið, sé ekki tilbúin að sleppa takinu af völdunum.
„Það er svo vant því að hafa völdin, það kann því svo illa að hafa þau ekki. En nú er bara komin önnur kynslóð og af hverju á hún að deila völdum með einhverjum sem er hættur og sögðust vera stignri af sviðinu. Hún þarf að fá að gera sín mistök eða ekki. Styrmir Gunnarsson er kannski besta dæmið um þetta. Hann er alltaf að tala um að það þurfi eldra og reyndara fólk að koma að, en hann er í rauninni að segja: „Við sem réðum öllu hér á sínum tíma, viljum fá að ráða aftur“.“
