„Ég myndi líta á það sem hálfgerða stríðsyfirlýsingu við íslensk heimili og verkalýðshreyfinguna ef Gylfi Magnússon dósent við viðskiptafræðideild Háskóla Íslands og formaður bankaráðs Seðlabanka Íslands, yrði skipaður nýr seðlabankastjóri.“
Svo ritar Vilhjálmur Birgisson, formaður Verkalýðsfélags Akraness og varaforseti ASÍ. Ástæðan er ummæli Gylfa á útvarpsstöðinni K100 þann 4. apríl, hvar Gylfi sagði það misskilning að lækkun vaxta væri góð fyrir heimilin í landinu:
„Það er misskilningur að lækkun vaxta komi heimilunum til góða og galið að takmarka lánstíma verðtryggðra lána.“
Vilhjálmur telur ekki þörf á manni með slíkar skoðanir í Seðlabankann og veðjar því á annan hest:
„Hugsið ykkur ef maður sem segir að það sé byggt á „misskilningi“ að það komi heimilunum til góða að vextir lækki verði næsti seðlabankastjóri! Ég segi, nei takk við þurfum ekki slíkan mann í Seðlabankann. Ég vil sjá Jón Daníelsson, prófessor sem næsta seðlabankastjóra.“
Fjórir umsækjendur eru metnir mjög vel hæfir af 12 umsækjendum um starf nýs seðlabankastjóra, samkvæmt Kjarnanum, en þrír hafa dregið umsókn sína tilbaka, þar af er Benedikt Jóhannesson, fyrrverandi formaður Viðreisnar.
Það eru Gylfi Magnússon, dósent við Háskóla Íslands, Ásgeir Jónsson, forseti hagfræðideildar Háskóla Íslands, Jón Daníelsson, prófessor við LSE í London, og Arnór Sighvatsson, ráðgjafi seðlabankastjóra og fyrrverandi aðalhagfræðingur og aðstoðarseðlabankastjóri, sem allir hafa doktorspróf í hagfræði.