Bæjarstjórn Sveitarfélagsins Hornafjarðar lýsti yfir áhyggjum sínum vegna ástands umferðarmála í Öræfum á fundi bæjarstjórnar í gær og óskar eftir samtali við samgönguyfirvöld. Hefur slysatíðni aukist mikið á svæðinu og banaslysum fjölgað og er álag sagt mikið á björgunarsveitir og slökkvilið.
Um 850 þúsund manns heimsóttu Skaftafell og Jökulsárlón á síðasta ári, eða um 2000 gestir á dag, en gatnakerfið er ekki hannað fyrir svo mikinn umferðarþunga, segir í bókun:
„ Meðalfjöldi bifreiða á síðasta ári við Lómagnúp var 1.344 á dag. Vegakerfið var ekki hannað fyrir þessa miklu umferð. Bæjastjórn óskar eftir samtali við samgönguyfirvöld um málið og að unnið verði að áætlun um breikkun vega, frekari fækkun einbreiðra brúa með það að markmiði að efla umferðaröryggi.“