Kerecis á Ísafirði hefur aukið hlutafé sitt um tvo milljarða króna. Greint er frá því á vef bb.is að talsverð umframeftirspurn hafi verið hjá fjárfestum eftir bréfum í fyrirtækinu, en meðal nýrra fjárfesta er félagið Emerson Collective, sem er í eigu Laurene Powell, ekkju Steve Jobs, eins stofnanda Apple og forstjóri þess í tvígang.
Powell var í 40. sæti á lista Forbes tímaritsins yfir ríkustu milljarðarmæringa heims árið 2018 og er sögð ríkasta konan í tæknigeiranum, en eigur hennar eru metnar á rúma 21 billjón dollara.
Meðal fjárfesta er einnig félagið Omega, sem er í eigu Novators, fjárfestingarfélags Björgólfs Thors Björgólfssonar, Alvogen og sjóðir á vegum GAMMA.
Hlutaféð er 6.2 milljónir hluta og áætlað markaðsvirði er um 12.4 milljarðar króna.
Kerecis var stofnað árið 2011 á Ísafirði og notar þorskroð við framleiðslu afurða sinna, til meðhöndlunar brunasára og annarra þrálátra sára. Fiskroðið inniheldur fjölómettaðar fitusýrur sem hafa jákvæð áhrif á frumuvöxt.
Hjá Kerecis starfa um 80 manns, þar af eru 55 í Bandaríkjunum.