Þetta eru niðurstöður nýrrar könnunar sem Zenter rannsóknir gerðu fyrir Fréttablaðið og fréttablaðið.is. Fram kemur að niðurstaðan sé svipuð og í könnun Zenter frá því í desember síðastliðnum.
Þegar svör allra eru skoðuð segist stærsti hópurinn, 36,3%, ekki vita hvort hann er með eða á móti samþykkt orkupakkans. Þegar öll svör eru tekin með þá sögðust 30,5% vera andvíg orkupakkanum, 18,5% hlynnt honum, 13,6% hlutlaus og rúmlega eitt prósent aðspurðra vildi ekki svara.
Þegar fólk var spurt hversu vel það hefði kynnt sér þriðja orkupakkann sögðu 32,1% að þau hefðu ekki kynnt sér hann og 26,5% sögðust hafa kynnt sér hann illa. 22,2% sögðust hafa kynnt sér hann vel og 19,2% hvorki vel né illa.
Stuðningur fólks við þriðja orkupakkann eykst eftir því sem fólk hefur kynnt sér málið betur segir í umfjöllun Fréttablaðsins. 46% þeirra sem sögðust hafa kynnt sér hann vel sögðust samþykk samþykkt hans en hjá þeim sem hafa hvorki kynnt sér málið vel eða illa var hlutfallið 26% og 19% hjá þeim sem hafa kynnt sér það illa. Hjá þeim sem ekki hafa kynnt sér það er hlutfallið 12%.
Úrtakið í könnuninni var 2.500 manns og var svarhlutfallið 57,7%.
