Samkvæmt nýrri spá Vinnumálastofnunar verða ný störf á þessu ári færri en fyrri spár gerðu ráð fyrir. Í upphafi árs spáði stofnunin um 2.000 nýjum störfum hér á landi á árinu en nú hefur spáin lækkað í 500 til 1.000 störf. Það er samdráttur í hagkerfinu, ekki síst í ferðaþjónustu, sem veldur. Á móti þessu vegur þó fjölgun starfa í þjónustugreinum og hjá hinu opinbera.

Morgunblaðið skýrir frá þessu í dag. Haft er eftir Karli Sigurðssyni, sérfræðingi hjá Vinnumálastofnun, að fyrirséð sé að fjölgun starfa haldi ekki í við fjölgun fólks á vinnumarkaði og þar af leiðandi muni atvinnuleysi aukast á árinu.

Í nýrri starfaskráningu Hagstofunnar kemur fram að 3.500 störf séu nú laus á vinnumarkaði en talið er að um 6.200 manns séu án atvinnu. Það eru því tæplega tveir atvinnulausir um hvert laust starf.