Helgi Bernódusson, skrifstofustjóri Alþingis, segir það starfsmönnum skrifstofunnar erfitt að vera ásakaðir um greiðslu tilhæfulausra akstursreikninga. Þetta kemur fram í tilkynningu á vef Alþingis.
Tilefni tilkynningarinnar er gagnrýni á akstursgreiðslur Ásmundar Friðrikssonar, þingmanns Sjálfstæðisflokksins, en því hefur verið haldið fram í umræðunni um að rökstuddur grunur sé á að Ásmundur hafi misfarið með almannafé og Alþingi gagnrýnt fyrir að bregðast ekki við þeim grun.
„Skrifstofan hefur engin gögn sem benda til þess að rangt hafi verið haft við og röngum eða tilhæfulausum reikningum verið skilað inn til endurgreiðslu.
Þegar þetta tiltekna mál kom til forsætisnefndar í annað sinn gerði skrifstofan á ný athugun á akstursbók Ásmundar en þar var ekkert að finna sem vakti grun um misferli.“
Helgi bendir á að Ásmundur njóti tvenns konar aksturgreiðslna. Annars vegar fyrir svonefndan heimanakstur sem er samningsbundin greiðsla fyrir akstur frá heimili að þingstað. Hins vegar sé um endurgreiðslu á aksturskostnaði vegna funda og viðburða í kjördæmi. Heimanaksturinn fæst aðeins greiddur ef þingmaður afsali sér húsnæðiskostnaði.
„Það er starfsmönnum skrifstofu Alþingis þungbært að sitja undir ásökunum um að greiða tilhæfulausa reikninga og gæta ekki að meðferð almannafjár.“