Brynjar Níelsson, þingmaður Sjálfstæðisflokksins og vonbiðill um embætti dómsmálaráðherra, er ekki ánægður með framvindu mála í tengslum við umræðuna um þriðja orkupakkann.
Umræðan hófst í þinginu á þriðjudag og var svo haldið áfram á miðvikudaginn þar sem þingfundur stóð til klukkan 06:10. Umræðan hélt svo áfram og má segja að þingmenn Miðflokksins hafi verið áberandi í umræðunni en þá stigu þingmenn flokksins 251 sinni í pontu í gær á meðan þingmenn annarra flokka stigu alls 36 sinnum í pontu.
„Maður var ekki glæsilegur eftir nóttina,“ segir Brynjar í samtali við DV. „Maður var orðinn hálf furðulegur og sólarhringurinn kominn í rugl. Það er heldur ekki eins og maður hafi verið að hlusta á eitthvað nýtt í hvert sinn.“
Brynjar telur ákvörðunina vera rétta að gefa þingmönnum örlítinn tíma í viðbót ef einhverjir eiga eftir að tjá sig meira en segir hann málið annars útrætt. „Það er ekki gott að sitja í forstöðustól heilu næturnar,“ segir Brynjar.
Á veraldarvefnum hafa margir hverjir bent á þreytulega útgang þingmanna og þá sérstaklega Brynjars. Rósa Björk Brynjólfsdóttir, fjölmiðlakona og þingmaður, er á meðal þeirra. Hún skrifar:
„Þetta myndi ég kalla mjöööög súrt partý… tveir sofandi en einn svellhress og lætur móðan mása“
Þetta myndi einhver kalla mjöööög súrt partý…tvö sofandi en einn svellhress og lætur móðan mása…#málþóf pic.twitter.com/BgheRbXEZM
— Rósa Björk B (@RosaBjorkB) May 22, 2019