Með himinskautum, ris og fall flugfélagsins WOW air, er vinnutitill nýrrar bókar um fall WOW air flugfélagsins sem Stefán Einar Stefánsson, fréttastjóri viðskiptablaðs Morgunblaðsins hyggst gefa út um næstu mánaðarmót. Frá þessu er greint í Markaðnum, viðskiptablaði Fréttablaðsins.

Verður bókin um og yfir 300 blaðsíður og mun innihalda nýjar áður óbirtar upplýsingar sem varpa frekara ljósi á aðdragandann að falli WOW air og þær tilraunir sem gerðar voru til að halda fyrirtækinu gangandi.

Skúli Mogensen, stofnandi og forstjóri WOW air, gaf ekki kost á samstarfi við vinnslu bókarinnar, en rætt var við tugi annarra einstaklinga sem tengst hafa WOW air með einum eða öðrum hætti.

Stefán Einar var formaður VR frá 2011 til 2013 en hefur starfað hjá Morgunblaðinu frá 2015. Hann er með meistaragráðu í viðskiptasiðfræði frá HÍ.