Íslenska ríkið óskar eftir endurskoðun yfirdeildar Mannréttindadómstóls Evrópu á Landsréttarmálinu. Þetta kemur fram í tilkynningu frá dómsmálaráðuneytinu.

„Við höfum síðustu vikur skoðað mismunandi fleti þessa mikilvæga máls. Eftir þá skoðun tel ég rétt að óska endurskoðunar hjá yfirdeild Mannréttindadómstólsins. Ég tel brýnt að fara þessa leið í ljósi þess hve mikilvæga hagsmuni málið snertir hér á landi. Ég mun halda áfram að skoða aðra fleti málsins en á þessu stigi verða ekki teknar frekari ákvarðanir,” segir Þórdís Kolbrún Reykfjörð Gylfadóttir, dómsmálaráðherra.

Landsréttarmálið svonefnda varðar mál ákæruvaldsins gegn Guðmundi Andra Ástráðssyni, en Mannréttindadómstóll Evrópu komst að þeirri niðurstöðu að brotið hefði verið á Mannréttindum Andra þar sem dómari í málinu hefði ekki verið skipaður með réttum hætti. Dómari í málinu hafði ekki verið meðal þeirra sem metnir voru hæfastir í starfið samkvæmt mati sérstakrar dómnefndar heldur hafði Sigríður Andersen, þáverandi dómsmálaráðherra, endurraðað á lista. Þetta þótti Mannréttindadómstólnum brjóta gegn ákvæðum Mannréttindasáttmálans um réttláta málsmeðferð, eða 6. gr. sáttmálans.

Í tilkynningu dómsmálaráðuneytisins segir að það sé mikilvægt að leita endurskoðunar á niðurstöðunni þar sem dómurinn hafi ekki bara áhrif hérlendis heldur einnig um alla Evrópu. Það sé mat sérfræðnga dómsmálaráðuneytisins, að  höfðu samráði við ríkislögmann og dr. Thomas Horn, málflutningsmanns og sérfræðings í mannréttindum og réttarfari, að leita endurskoðunar. Þetta sé mikilvægt þar sem málið veki upp veigamiklar spurningar um túlkun og framkvæmd Mannréttindasáttmála Evrópu.

„Líkur standa til þess að niðurstaða um það hvort yfirdeildin taki dóminn til endurskoðunar fáist innan fárra mánaða. Taki yfirdeildin málið til endurskoðunar verður þess óskað að málið njóti forgangs en MDE hefur frá upphafi skilgreint málið mikilvægt og hlaut það flýtimeðferð á fyrri stigum.“