Ef tekið er mið af bílunum sem eru á myndinni myndi maður ætla að þessi ljósmynd sé tekin í kringum 1950 eða svo. Hún birtist á vefnum Gamlar ljósmyndir en þar segir ekkert um tilurð hennar. Myndin er greinilega tekin út um glugga á Landakotsspítala, yfir Túngötu. Þarna sést húsalengjan við Hávallagötu, glæsileg hús sem þarna eru væntanlega nýbyggð – þarna bjó nokkuð af efnafólki. Ég man sérstaklega eftir útgerðarmanninum Tryggva Ófeigssyni. Hann var með stóran hatt og átti stóran amerískan bíl með vængjum.
Ég man eftir íbúunum í næstum hverju einasta húsi í þessu hverfi – stundum geng ég þarna um og rifja þá upp þangað til það verður nánast íþyngjandi.
Þarna er Landakotskirkjan á vinstri hönd og Landakotsskóli á hægri hönd. Myndin hefur aðallega gildi fyrir mig vegna þess að hún sýnir hvernig þetta svæði leit út þegar ég var krakki. Þetta var nefnilega besti fótboltavöllur æsku minnar. Túnið var slétt, það grænkaði snemma á vorin, þetta var mátulega stórt pláss. Girðingarnar voru líklega öðruvísi þá.
Svo var reist nýbygging við kirkjuna fyrir biskup kaþólsku kirkjunnar og presta og þá hvarf túnið góða. En það var heldur ekki alveg átakalaust að vera þarna í fótbolta. Séra Georg átti það til að koma út og reka okkur iðkendurna burt. Fyrir vikið var okkur mjög í nöp við karlinn.
En þau voru mörg yndisleg sumarkvöldin þarna.