Maður tekur ofan fyrir stjórnendum Grand hótels að hafa úthýst kynningarfundi sem átti meðal annars að fjalla um vopnaburð – með útsendurum fyrirbæris sem nefnist European Security Academy.
Það hefur komið fram að meðal þeirra sem standa fyrir fundinum er Vakur – það er félagsskapur sem hefur áður flutt inn haturspostulann Robert Spencer og gerði svo tilraunir til að koma með enska öfgamanninnn Tommy Robinson til Íslands.
Eins og kom fram í pistli hér á síðunni í gær eru hryðjuverk hægri öfgamanna vaxandi vandamál – fjöldamorðin á Nýja Sjálandi leiddu í ljós að ekki einu sinni friðsæl ríki eru óhult. Þetta er nokkuð sem lögregluyfirvöld þurfa að fylgjast með – sem og hinni vaxandi hatursumræðu sem verður sífellt grófari og ofsafengnari.
Við getum ímyndað okkur – hefðu til dæmis samtök eins og No Borders auglýst meðal félaga sinna námskeið í vopnaburði. Þá hefðu nú aldeilis heyrst hljóð úr horni.
