Skúli Mogensen, stofnandi og aðaleigandi hins gjaldþrota WOW air, hefur í hyggju að endurreisa flugfélagið ásamt hópi fjárfesta. Ætlunin er að byggja á lággjaldamódeli eins og WOW air átti upphaflega að gera.

Morgunblaðið skýrir frá þessu í dag. Fram kemur að hópurinn leiti nú að 40 milljóna dollara innspýtingu í félagið í formi hlutafjár. Samkvæmt fjárfestakynningu, sem er til kynningar, munu þeir fjárfestar sem vilja leggja þetta fé í félagið eignast 49% hlut í því á móti Skúla, lykilstjórnendum WOW og öðrum sem eru nefndir „aðrir stofenendur“ félagsins.

Morgunblaðið segir að nýja félagið sé með vinnuheitið NewCo og hyggist það kaupa „allar mikilvægar eignir“ úr þrotabúi WOW air, þar á meðal er vörumerkið.

Fram kemur að lykilstjórnendur Arctica Finance, sem unnu með Skúla að fjármögnun WOW air, hafi fundað með Sveini Andra Sveinssyni, öðrum skiptastjóra þrotabús WOW air í fyrrakvöld.

Morgunblaðið segir að samkvæmt áætlunum NewCo eigi nýja flugfélagið að vaxa mun hraðar en WOW air gerði á sínum tíma. Stefnt er á að félagið verði komið með sjö flugvélar í rekstur á næsta ári en þeim fjölda véla náði WOW air ekki fyrr en á fimmta rekstrarári sínu.