Jens Stoltenberg, fyrrverandi forsætisráðherra Noregs og nú framkvæmdastjóri Nató, fékk að ávarpa Bandaríkjaþing í dag – í tilefni af 70 ára afmæli Atlantshafsbandalagsins. Varla nenna margir að hlusta á ræðuna alla – en Íslendingar hjuggu eftir því að hann hefði sagt í henni að Leifur Eiríksson hefði verið Norðmaður.
Og þannig var það þýtt í fréttum í sjónvarpinu. Maður sá á alnetinu að margir tóku þetta óstinnt upp – eru Norðmenn alltaf að reyna að skreyta sig með stolnum fjöðrum?
En svo var athugað nánar og þá kom í ljós að Stoltenberg hafði, með sínum sterka norska hreim, sagt Norseman. Einhver komst svo í norska útgáfu á ræðu hans og þar sagði nordboer.
Sem þýðir maður norrænn – en það voru íbúar Íslands einmitt í árdaga, norrænir menn.
Þarna fór góð móðgun fyrir lítið.