Það mæðir mest á ungu fólki í loftslagsuppreisninni sem nú gengur yfir heiminn. Unglingar og jafnvel börn þyrpast út á götur til að reyna að koma vitinu fyrir þá sem eldri eru. Þeirra er framtíðin – hvort sem hún verður björt eða myrk.
Þetta er þó ekki alveg einhlítt. Þessi áttatíu og þriggja ára gamli breski karl hefur líka orðið ásjóna þessara mótmæla. Hann var handtekinn í mótmælum í Canary Wharf í London eftir að hafa klifrað upp á lestarvagn. Og síðan leiddur burt í lögreglufylgd.
Maðurinn heitir Phil Kingston, hann er kaþólskrar trúar og er úr hópi kristinna aðgerðasinna.
Í frétt var haft eftir honum að hann mótmælti vegna barnabarnanna sinna. „Ég elska þau svo mikið og það gerir mig afar hryggann að hugsa um hvernig heim við skiljum eftir handa þeim.“