Myndlistarmaðurinn snjalli, Steingrímur Eyfjörð, er í skemmtilegu viðtali í Morgunblaði helgarinnar – það er sjálfur menningarritstjórinn Einar Falur Ingólfsson sem ræðir við hann. Tilefnið er að Steingrímur opnaði í gær sýningu í Hverfisgalleríi – hún ber yfirskriftina Megi þá helvítis byltingin lifa. Það mun vera tilvitnun í Sólveigu Önnu Jónsdóttur, formann Eflingar. En Steingrímur segir í viðtalinu: „Auðvitað verður samt engin bylting.“
Steingrímur ræðir meðal annars um skort á fagurfræðilegum viðmiðum, „stjórnvöld hafa til dæmis enga fagurfræði, bara einhvern neyslusmekk,“ segir hann.
Einar Falur spyr hvort verk Steingríms séu viðbrögð við hinum póstmódernísku tímum þar sem „allt á að vera jafngilt?“
Steingrímur svarar:
„Sá tími er búinn. Og hlutir þurfa að fá merkingu. Sjáðu þennan arkitektúr hér niðri í bæ,“ segir hann og bendir á nýbyggingarnar við Hafnarstræti. „Það er grátlegt að hafa ekki notað tækifærið til að fá arkitekta til verksins sem hefðu komið með einhverja fagurfræði og þekkingu, í stað þess að koma með þetta „big city look-a-like“ sem sýnir bara minnimáttarkenndina í okkur Íslendingum. Nú þurfum við Reykvíkingar að búa með þessu!“