Það leit út fyrir það um tíma að allt Íslands myndi fyllast af kleinuhringjum. Lýðheilsufrömuðir höfðu áhyggjur, en almenningur beið í löngum biðröðum framan við kleinuhringjastaðina og gekk svo burt með stóra kassa af þessu góðgæti.
En tímabil kleinuhringjanna gekk hratt yfir á Íslandi. Það verður kannski að segjast eins og er að þetta er frekar ólystug matvara – að minnsta kosti benda viðskiptahættir íslensku þjóðarinnar til þess.
Dunkin’ Donuts ætlaði að opna 16 kleinhhringjastaði á Íslandi, sá fyrsti opnaði 2015 á Laugavegi, þá var biðröðin svona, en plönin gengu ekki eftir og nú er alveg búið að loka Dunkin´Donuts.
Í kjölfarið á Dunkin´Donuts kom kleinuhringjakeðjan Krispy Kreme. Sú innrás er líka að mistakast algjörlega, því í dag var tilkynnt að tvö af þremur útibúum Krispy Kreme á Íslandi væru að loka. Þessir kleinuhringir verða þá framvegis einungis fáanlegir í Smáralind.
Kleinuhringjainnrásin fór semsagt nánast gjörsamlega út um þúfur á innan við fjórum árum.
En íslenska kleinan lifir. Reyndar hefur verið stungið upp á því að hún fái að heita dough-knot á ensku.
