Talsvert er fjallað um sigur Hatari í undankeppni Evróvisjón á Íslandi í ísraelskum fjölmiðlum og mikið gert úr fyrri yfirlýsingum hljómsveitarmeðlima og gagnrýni þeirra á Ísrael. Fréttin hér að ofan er úr Times of Israel og hún heldur svona áfram. Þarna er talað um að Hatari gæti lent í því að vera vísað úr keppninni fyrir að brjóta reglur um pólitískan boðskap.
En Jerusalem Post segir svona frá frá sigri Hatari. Þar eru líka vangaveltur um að hljómsveitin kunni að vera rekin úr keppninni. Það er ljóst að Ísraelar munu fylgjast grannt með öllu sem má túlka sem pólitík. Núorðið er reglan hjá þeim að mæta öllu slíku með hörku.
Hatari – og Ísland og Íslendingar – fá svo óblíðar viðtökur í athugasemdakerfum þessara blaða. Þar er hvatt til þess að atriðið verði bannað,þeim verði ekki hleypt inn í Ísrael, spurt hvort Ísland sé íslamskt ríki, því haldið fram að þarna séu Íslendingar að verða sér til skammar, spurt hvert framlag Íslendinga til heimsins hafi eiginlega verið, hvort einhver myndi taka eftir því þótt Ísland hyrfi af yfirborði jarðar, einn vonar að verði slökkt á Hatari í miðri útsendingu, annar minnir á hvalveiðar Íslendinga.
Svo er sagt að þarna sé á ferðinni rótgróið gyðingahatur lúterstrúarmanna, minnt á hvalveiðar Íslendinga, en svo er þarna íslensk kona sem biðst afsökunar á öllu saman. Henni svarar svo maður sem segir að varasamt sé fyrir hina lítilmótlegu Íslendinga að vanmeta Benjamin Netanjahu en eins og kunnugt er hefur Hatari boðið honum í glímu.
En við erum semsagt komin inn á ansi viðkvæmt svæði. Ísraelar virðast búast við einhverjum óskunda frá Hatari – og einhvern veginn verða þeir að útbúa atriði sitt þannig að sé einhver meining með gjörningnum sem hefur gengið svo vel hingað til og broddur í honum.