„Ég bið öll agalegs forláts en ég fæ ekki orða bundist á þessum fallega morgni þegar sjálft undursamlegt og blessað vorið er í loftinu og finn mig bókstaflega knúna áfram af einhverri nauðhvöt sem ég einfaldlega verð að láta undan: Það var algjört smámál að lækka launin mín um 300.000 krónur.“
Þetta segir verkalýðsforinginn Sólveig Anna Jónsdóttir og deilir frétt þar sem vitnað er í Friðrik Sophusson fyrrverandi ráðherra Sjálfstæðisflokksins og stjórnarformann Íslandsbanka. Friðrik segir í samtali við Fréttablaðið að það hefði verið stórmál og snúið að lækka laun Birnu Einarsdóttur úr 4,4 milljónum á mánuði niður í 3,8 milljónir á mánuði.
Sólveig Anna lækkaði sín laun um 300 þúsund krónur þegar hún tók við embætti formanns Eflingar. Sólveig segir:
„Þið mynduð ekki trúa því hvað það var auðvelt. Ég hugsaði um það í smá tíma og framkvæmdi svo. Bókstaflega svona einfalt.“
Þá segir Sólveig Anna:
„Ég bara varð að koma þessu á framfæri af því að ég vil ekki að Friðrik Sophusson, stjórnarformaður Íslandsbanka og meðlimur pólitískrar og efnahagslegrar yfirstéttar til margra áratuga, komist upp með að halda því fram að launalækkun Birnu Einarsdóttur hafi verið voðalega vandasöm.“
Sólveig Anna segir að lokum:
„Það er aldeilis ekkert erfitt að lækka laun, ég hef prófaði það og veit því af persónulegri reynslu um hvað ég er að tala. Piece of cake og á endanum eiginlega það auðveldasta sem ég hef gert.“