Stundum nennir maður ekki nútímanum.

Hagkaup í Skeifunni klukkan svona tíu á fimmtudagskvöldi.

Inni í búðinni er maður kominn með alvarlega bakþanka af því verðlagið er svo hátt. Er eiginlega viss um að maður sé kominn á rangan stað.

Það er einn starfsmaður á afgreiðslukassa og löng biðröð hjá honum. En búið að setja upp fjölda af sjálfsafgreiðslukössum. Þar er einn maður að baksa við að afgreiða sjálfan sig.

Greinilegt að hinir kúnnarnir kæra sig ekkert um þetta. Nenna því ekki. Fara frekar í biðröðina. Því það gerir nákvæmlega ekkert fyrir mann að afgreiða sjálfan sig.

Allt í einu upp fyrir manni að í fréttum hefur komið fram að forstjóri þessarar litlu verslanakeðju á litla Íslandi er með 7 milljónir í mánaðarlaun.

En það eru lífeyrissjóðir sem eiga langstærsta hlutann í móðurfélaginu Högum – Gildi, lífeyrissjóður ríkisstarfsmanna, lífeyrissjóður verslunarmanna. Lífeyrissjóðir sem maður hefur sjálfur borgað í.

Hvað ætli starfsmaður á kassa í Hagkaup fái í laun? Sá sem á nú að gera óþarfan og úreltan með sjálfsafgreiðslunni.

Stundum nennir maður ekki nútimanum.