Árshlutareikningur samstæðu Reykjavíkurborgar fyrir fyrri helming ársins 2019 var til afgreiðslu í borgarráði í morgun. Rekstrarniðurstaða A-hluta borgarinnar er lakari en áætlanir gerðu ráð fyrir og versnar um helming frá sama tímabili og á síðasta ári. Ef ekki kæmi til matsbreyting fasteigna Félagsbústaða hf. upp á 3,5 milljarða væri sama staða hjá samstæðunni í heild, samkvæmt tilkynningu frá Sjálfstæðisflokknum.
Skuldir og skuldbindingar A-hluta vaxa um 5,5, milljarða á sex mánuðum sem er nálægt milljarði á mánuði en skuldir samstæðunnar í heild aukast um 19 milljarða á sama tímabili eða um rúma þrjá milljarða á mánuði.
Sjálfstæðisflokkurinn lagði til á fundi borgarráðs í morgun að fengnir yrðu óháðir matsaðilar til að meta eignasafn Félagsbústaða hf., þar sem matsbreytingar síðustu ára eru 50,8 milljarðar króna. Þannig hefur félagslegt íbúðarhúsnæði borgarinnar verið uppfært í bókum Félagsbústaða um sömu fjárhæð. Jafnframt er reiknaður hagnaður upp á sömu fjárhæð í samstæðu Reykjavíkurborgar.
„Matsbreytingar upp á 51 milljarð króna skila sér seint inn á bankabók Reykjavíkurborgar,“ segir Eyþór Laxdal Arnalds, oddviti Sjálfstæðisflokksins í borgarstjórn Reykjavíkur, í tilkynningu frá Sjálfstæðisflokknum:
„Ljóst er að þessi hagnaður mun seint skila sér til borgarinnar enda stendur ekki til að selja félagslegt húsnæði frá Félagsbústöðum. Hætta er á að viðhaldsþörf íbúðanna sé meiri en gert hefur verið ráð fyrir. Kostnaður við viðhald getur því verið að miklu leyti ófyrirséður.“
Fjármála- og áhættustýringarsvið borgarinnar bendir á í sex mánaða uppgjöri Reykjavíkurborgar að matsbreytingarnar segi lítið til um grunnrekstur Félagsbústaða hf.
Eyþór bendir á að skuldir og skuldbindingar haldi áfram að vaxa um tugi milljarða á fyrstu sex mánuðum þessa árs þrátt fyrir mikla skattlagningu.
„Þetta er ekki gott veganesti út úr lengsta hagvaxtarskeiði lýðveldissögunnar,“
segir Eyþór.